【品牌創業故事】由印銀紙變燒錢 e-Banner創辦人：減價唔流血對手點會怕你 (印刷業/陳剛雄/BrandStory/Chris)...... !

千禧年代前，是印刷業最風光的時代，當年擁有一部印刷機，幾乎等於持有一部印鈔機，不停地印「銀紙」，但經過二十多年洗禮，行業由生金蛋變成流血戰，面對這個夕陽行業，e-Banner創辦人陳剛雄（Chris）於汰弱留強戰役生存下來，感受深刻，他笑指：「呢一行係好微利，係得印聖經嘅同行發咗達，我都係盡量喺夕陽中做落去。」他想出以快餐店自助形式，打入大眾市場，為一架走下坡的汽車找煞車掣。

Chris從事印刷業20多年，曾跟另一公司合併壯大舊公司，後來經過「創業—合併—出局」這條方程式，被前拍檔辭退這間自己建立的舊公司，隨後東山再起，成立目前的e-Banner，再次在行業企穩陣腳，經過多年，他已不再感到欷歔及憤怒，反而學懂保護自己：「以前專心經營，而家學識咗好多嘢要自己持有，合約要寫清楚，否則出事後，連架車、電話號碼都冇埋！」

走入e-Banner位於觀塘的廠房前，原想到會很雜亂及油墨味，但其實除了擺放大量卡紙板塊，只得小量員工，一部打印機全天候印貨，另一部切割機自動切開噴畫，不用1分鐘就能出貨。不過記者在觀塘工業中心這條街上走不到5分鐘，已經看到有5個同行競爭，出售貨品大同小異，包括曾經最熱賣，佔整個旺角的「易拉架」，Chris表示跟行家主力產品不同：「我哋主要做噴畫，至於易拉架，以前真係好好賺，係暴利，而家幾乎係蝕住做。」

Chris口中的易拉架到底有幾暴利？他笑言：「2002年嗰時，做一個易拉架要兩千元，我接咗張單去做，喺大陸採購，經朋友介紹只係需要幾百元！我一做就做幾百個，利潤好高！」不過容易賺錢的生意，又怎會是獨市生意呢，很快便有其他競爭者加入，行業進入劈價戰，易拉架由2,000元減到最低50元一個，即是每賣一個蝕一個：「個藍海染紅咗，惟有割喉式減價，同人打架，你都冇流血，對方怎會怕？當時心態是蝕錢贏口碑。」這場仗維持了3年才結束。

公司要生存，由企業市場轉戰大眾市場，並想出快餐店形式，提供ABC餐，節省人力成本，「以前印刷要求很高，顏色接近要完美，但現時一個師奶用『小畫家』畫完都可以去印。要將個自助平台做到好簡單，不要讓客人覺得猶豫及複雜。而家你印一樣嘢，我都接嚟做，慢慢形成用家市場。」Chris認為用自助形式，除了吸納用家，更可節省銷售團隊人手，以及杜絕講價現象：「例如你婚宴，預咗8,000元預算，去到我哋網發現5,000元，即刻Deal啦！但如果用sales同你傾，話4,800元嘅，都會講價，可能仲平過4,800元！」同時自助方式，不會幫客戶更改圖案，改為教導客戶去編裁適合公司平台的檔案：「幫個客改係好心做壞事，例如有客人喺諾士佛臺印易拉架，發現上下倒轉咗印，公司以為印錯，幫佢改番正常，但原來諾士佛臺唔可以放易拉架，客人就掛燈柱倒轉擺！」

由招呼大客改為以量取勝，目前客戶包括有茶記、電訊公司、髮型師甚至師奶及學生，Chris認為大眾市場好處是較有增長前景及加價空間：「商業客幾個都夠養公司，但好大風險，冇咗兩個客就冇咗一半收入，現在我有廿幾萬個客，每個月嚟幫襯一次已經夠，如果多一次，咁生意就係double，幾十萬個客，我每個加價1元都好多，但商業客戶係好難去加價。」他又指出跟gogovan及貨車合作，在數千架貨車上印上廣告，並裝上GPS定位賣廣告。公司去年營業額近1億元，但利潤只得270萬，純利率不足3%，跟當年行業最風光時期相比，像由天堂跌落地獄，回想當年Chris被一手創立的舊公司辭退，錯失了數年黃金時間，但他慶幸目前仍有能力在行業生存：「現在計，我生意、分店都好過舊舖。呢一行由開始做到今日都係夕陽，但起碼養到成班夥計同自己，我會盡量在夕陽中做落去。」
記者：陳新政
影片：

採訪 / 陳新政 朱得志

編撰 / 朱得志

攝影 / 馮峰 卓振輝

剪接、後期 / 劉曉彤

編導 / 梁依能

編審 / 倪敏慧


資料引自蘋果日報