【996工作制】前阿里員工親述血淚史：「日做13個鐘，6年換數百萬股權」(馬雲/香港網商會副主席/張群/Alibaba Working Hours)...... !

早前「996」（即朝9晚9、每周6天工作）掀起中國IT界強烈反彈，更有業界人士製作「996.icu」網站，怒轟網絡公司制定不人道工作時數，「工作996，生病ICU。」

「996」原本針對京東、有贊等電商，但之後阿里巴巴董事局主席馬雲卻在微博發文稱，「996是一種巨大的福氣」、「如果你熱愛工作其實12個小時不算太長」，引發全國網民強烈批評。為平息風波，他改稱「996」不是問題的關鍵，關鍵是人生的意義和奮鬥的方向。

在阿里巴巴工作6年，曾升至阿里香港業務拓展負責人，現經營電商、香港網商會副主席張群，坦言阿里工作時間「點止996，基本係朝10晚11」，更爆出長期高壓下，未過試用期已有超過3成人離職，有同事更要租公司附近酒店房工作，「瞓瞓吓都要開會。」但他坦言對工作無怨無悔，言談間亦揭露了馬雲推崇996的原因。

阿里基本上班時間：朝10晚11
訪問一開始，曾在阿里銷售部門工作的張群直言：「每位一開始入去阿里嘅人都會聽過，你哋係出緊1.5個月嘅糧，但係做緊3個人嘅嘢。」

「同行競爭好激烈，鬥嘅係執行力、鬥快！」他指公司沒有明文規定要星期六上班，但他在職首3年部門所有同事星期六都會上班，「KPI（關鍵績效指標）、股權獎勵等，無形令到同事OT。」他指以前的上班時間基本上是朝10晚11。「好似sales，唔止銷售，仲要兼顧埋training、admin、搞展覽，客越多就越忙。」他指前阿里的公司文化是鼓勵競爭：「唔同地區都會競爭，甚至有淘汰機制。」

他坦言，加入公司時電商市場仍屬起步階段，阿里的知名度遠比現時低。最誇張就是每年3月財政年結束時，「試過有同事要喺公司附近租房瞓，因為要到target，佢成個月返唔到屋企嘅。但係香港已經算好，大陸嚟講朝8晚12、7日都聽唔少。」你認為這個政策有利有弊：「公司發展速度係會高速增長，但係家庭時間、生活時間就無。」他直言即使回到家，仍在不斷工作「凌晨個客打嚟，美國個邊開會都試過。」

台灣《蘋果日報》曾報道，即將接替馬雲擔當董事長的張勇工作時數超長，每天10多小時，甚至常超過18個小時。阿里副總裁董文紅曾說：「我覺得自己夠努力了，但我發現老逍（張勇）比我還努力。」阿里長工時文化早已成了一種不成文的規則。

五年後員工走剩一成

他亦透露短短6年間公司同事不斷離開，主因是壓力太大：「頭3個月已經走三份一，一年就走一半，五年後得番一成。」記者問到有什麼驅使他留在公司？他坦言「由公司轉形、到香港退市到美國上市，成個過程都學到嘢，老實講係搵到錢。」至於離開的原因，他坦承因為健康明顯變差：「人生去到下一階段，要開始兼顧家庭、健康，唔可以再日以繼夜工作。」

由僱員變成僱主，張群表示現時純粹用錢難以打動人才，他亦指兩岸三地員工的心態亦十分不同：「大陸人係最肯OT、香港人只要覺得係合情合理，佢哋都會肯，而台灣人係死都唔會同你OT，佢哋係唔受得壓力，所以咪長期25K(台灣起薪工資長期低迷，入職約25,000台幣，即6,344港元)。」

他亦指曾有前同事用阿里的一套來管理公司，結果失敗：「有公司嘅背景、體系，背後又有一個咁大嘅精神領袖，阿里嘅人OT，好多都係因為使命感，如果個個都朝9晚5，公司一定唔會今時今日。」更指出，「點解中國電商發展得咁快，唔係班人特別叻，係大家休息嘅時候都跑緊，好多中國公司成功，都係喺好短嘅時間做到個規模，攞條命去博。我覺得係香港任何行業都需要學習。」

捱6年收獲：數百萬

張群亦坦言：「好多人依家已經成功咗，或者開始結婚、拎咗股權嘅變成千萬、億萬富翁，你要佢哋好似以前咁捱係無可能。」他指「996」未必是社會一個規定的工作模式，「啱啱畢業，去到30歲，可以享受到996都係一件好事嚟嘅。」但他強調「嗰樣嘢係被迫、無價值嘅，咁就唔係咁好囉。」現為電商創辦人的他指，合約不會規定同事星期六、日上班：「平日都係朝9晚5，但有個別部門真係有deadline，就要有責任感，唔可以因為要放假而改。」

記者亦問到張群，現時香港經濟不及80年代高速增長，加上樓價高企，要年青人在看不到前景下長時間工作十分困難。他就指：「悲觀嚟睇，如果無，我就情願唔做，係唔係返5日office hour就會好啲呢？我又覺得唔係。」記者多番追問下，他終透露在阿里工作6年，獲得的股權以現價計，可獲數百萬元，他笑向記者指，「收獲緊係唔止咁少，好似你搵我訪問，都係因為我做過阿里！」

記者：梁延宇


資料引自蘋果日報