【外判惹的禍】灣仔盧押道垃圾收集站 : 外判商遲到早退 食環署闊佬懶理 (bad effect of service contract out) ....!

[東方日報] 聖經話，懶惰係人類七宗罪之一，真係一啲都冇講錯。淨係一個小小食環署咋，外判承辦商蛇王醜聞層出不窮，署方話就話成立「狗仔隊」突擊巡查，可惜有姿勢冇實際，純粹得個睇字。

係咁嘅，由外判承辦商負責嘅灣仔盧押道垃圾收集站，長期處於無王管狀態，明明工作時間係早上六點半至晚上十一點半，但外判管工周不時唔見影，起碼下午一點先施施然現身打卡，晚上八點就收工，實際工作最多七、八個小時。咁仲唔止，十七名夜更員工有樣學樣，個個提早鬆人，「最準時」嗰個係十點收工，仲會幫早退嘅同事代簽更簿添，問你服未。

即係咁，外判工人遲到早退，唔止搞到垃圾堆積如山，最離譜係搞到市民要自行操作垃圾壓縮斗倒垃圾。咪以為咁係小事，站內明文規定，除承辦商授權嘅操作員，其他人嚴禁使用壓縮斗，事關使用不當，隨時出事。仲有呀，外判工人當值期間一樣係懶懶閒，打機、煲煙、飲酒樣樣齊，甚至將易燃物品隨處亂放，睇見都牙煙。

講到呢度，大家一定會問，唔通食環署冇監管嘅咩？嗱，真係講都冇人信，其實每日都有身穿食環署制服嘅職員嚟垃圾站檢查更簿，但睇完就算，即使有外判工人喺佢面前玩手機亦一於少理。正如食環署工會話齋，外判承辦商明顯違規，當局可按規定罰款，署方乜都唔做，根本就係失職。

話時話，食環署早於十幾年前已成立俗稱「狗仔隊」嘅服務質素檢定組，專門監管署方人員及外判承辦商嘅服務質素，可惜形同虛設。多隻香爐多隻鬼，食署官僚一味諉過前線人員，對體制漏洞視若無睹，狗仔隊唔止浪費公帑，仲被指搞「白色恐怖」添。所以話，食環署自己監管自己，盞嘥氣嘅啫。

其實，莫講話外判承辦商蛇王當食生菜，食環署職員亦係其身不正。呢，去年本報踢爆食環署油尖區環境衞生辦事處集體蛇王，職員借舉行歡送午宴為名，食足兩小時不特止，食完飯仲行街購物添。上樑不正下樑歪，食環署本身就係一個大蛇竇，外判承辦商又點會唔係有樣學樣喎。

講番垃圾站嘅問題吖，區議員係咁講嘅，灣仔區每月平均接獲一百五十宗投訴，成為全港衞生黑點三甲地區，鼠患仲非常嚴重添。大家睇到嘞，食環署監管不力，承辦商蛇得就蛇，後果真係好嚴重，唔怪得香港烏煙瘴氣喇！