【公務員2015加薪遙遙無期】財會拉布 二百萬公帑枉燒 ....!

圖片引自網絡

東方日報 2014年12月17日 財會拉布 二百萬公帑枉燒 (連結) :

近年立法會「拉布」風氣由大會蔓延至各大小委員會，最終要由納稅人埋單。行政管理委員會尋日開會本來傾緊財爺要求各政府部門、立法會及司法機構都要喺後年起減少百分之一開支，點知傾傾吓，就講到「拉布」連連嘅財務委員會，各種原因下要使二百萬元，納稅人無啦啦變成「冤大頭」。

行管會講到財委會「苦況」，話本來每隔兩星期、每次開兩小時嘅會，變成每星期開四小時會，唔少職員都話惡啃，長工時做無意義嘅「無米粥」，搞到最近專門負責做財委會秘書嘅助理秘書長劉國昌，都決定另謀高就，轉工去醫管局。

行管會初步討論增加三名議會秘書幫手做財委會，保守估計薪酬等支出都要幾十萬至百萬元。據知泛民委員問秘書處有冇關心職員壓力、點解離職。建制派委員葉國謙同方剛就省到泛民一面屁，話咪係你哋泛民「拉布」搞成咁囉，仲惡人先告狀？最後雙方都同意加人兼加資源。

另外，有泛民議員早前就上任財委會主席吳亮星（星爺），主持通過新界東北規劃撥款決定提司法覆核。行管會都傾過，由於星爺係代表財委會作決定，同意由立法會畀錢打官司辯護，初步預算要一百萬元。