【新一代在職場】湊90後出差 上司嗌頭痕 (A new generation in the workplace).....!

[晴報] 新一代在職場的趣怪表現，不時成網絡熱話。有核數師指，曾有九十後出差時拒絕上司指令，更向父母求救；人力資源顧問亦指，部分人出差連內褲襪子也乾洗，報銷逾千元；亦有人力顧問形容九十後上班如上學，上廁所也等埋一齊。

自稱從事銷售業的網民，在討論區講述與九十後同事出差經驗。包括對方因打機夜瞓，每朝鬧鐘響十多次仍不起床，拖垮工作行程。帖文又指這位同事連吃飯也拿不定主意。
有網民慨嘆部分年輕人從小受父母寵愛，缺少社會經驗。亦有人認為僱主也有責任，應多體諒新人。另有人認為，不應一竹篙打一船人，並非每個九十後也如此。

為買雞蛋仔 稱有事不可OT

任職核數師的Candy（化名）指，曾與三名九十後實習生返內地工作，感覺如湊仔，「經理叫佢哋去銀行幫手對數，個客有派司機接送，唔使自己搭車，佢哋竟然話車程要兩個鐘唔安全而拒絕。仲打電話畀阿媽求救，要經理同家長解釋點解要佢去咁遠做嘢」！
她指行內經常加班已街知巷聞，「有個九十後同事未夠六點已熄電腦，佢話有事唔可以OT，原因係趕住去買雞蛋仔，因為間舖好早收，我哋聽到都唔識畀反應」。

年輕人通病 欠社交禮儀

獵頭公司Core Search董事總經理張慧敏指，部分九十後出差對工時很計較。「他們認為工作是朝九晚六，晚上拒絕跟客應酬。就算肯跟客吃飯，又嫌菜餚不合胃口。」另外，有些人更抱着「出trip咁辛苦，着數要攞番夠本」心態。「有人連內褲同襪都在酒店乾洗，要公司花二千多元。亦有人叫room service歎紅酒、鋸扒等，閒閒地幾千蚊埋單」！

人力資源顧問公司Faro Recruitment（香港）總監張優娜指，欠社交禮儀及時間管理是九十後常見弊病。「例如見工時，面試官行入會議室，半數人仍呆坐，懶洋洋接過卡片，而非站立雙手接住」，至於首日返工，永遠是最後一分鐘到達，更有女生返抵公司才化粧。她又留意到九十後員工有個怪現象，指他們「返工、放工就算不同路，都要相約一起搭鯩，連去廁所都等埋一齊。」

棄家長式管理 讓員工發揮創意

青協青年就業網絡單位主任張志偉表示，現時大部分家庭只生育一至兩個小孩，不少90後都是獨生子女，加上社會經驗尚淺，初出來工作可能不懂人情世故，及不諳社交禮儀。「可能佢哋習慣在家有人執拾，部分人放工前不會清理枱面。放工又無跟上司講一聲，搞到別人唔知佢哋行開咗抑或已放工。」

張優娜認為，普遍90後抗拒家庭式管理，建議僱主發放工作時說明目的、要求結果及提交工作死綫，留待空間讓他們摸索，有助發揮其創新潛力。待完成工作後，再應跟他們「賽後」檢討，助他們作出改善。