【見工Q&A】應該如何在見工時講自己離職或搵工原因 ? Thank You Letter有無用 ? 不懂回答問題時怎樣處理 ? 見工衣著問題 ? 個人強弱項如何回答 ? career path ? 如何介紹自己 ? 見工大忌 ? EXPE

1. 應該如何在見工時講自己離職或搵工原因？

離職，裁員，被炒都係負面既野，千其唔好再鑽入去。講一D正面的既野，或者可以化危為機。 

a. 自動辭職 : 千其唔好話你同舊同事或老闆相處有問題，就算係真都好。講下你以前份工既前途有小小限制，唔可以發揮你所長或者career path同你既理想有小小出入。同老闆傾過發覺無機會係短期內(3幾年內)改變（或根本無得變），所以想搵工，而見緊呢份又可以比到一D以前份工比唔到既野（如前途，新知識，新發揮。千其咪講人工高！）覺得可以發揮所長同可以對公司有乜貢獻。

b. 公司裁員 : 講下你點解唔認同你老闆，認為你個位將會（係好市時）為公司帶黎機會。可以點幫到公司賺錢。講下你對舊公司既貢獻，客觀的令新公司認為炒你係你以前老闆既錯但係佢又係逼不得意。做老闆都知，雖然裁員得都有機會係冗員，但係好多時係因為其他原因，例如蝕得好甘，人事關係等等。最緊要唔好踩你舊公司，要客觀的。 

2. 寫Thank You Letter有無用？ 

Thank You Letter係幾有用嫁！等人地覺得你有心想做呢份工！又有禮貌。又成熟識do。 

3. 見工時被人問到不懂回答時怎樣處理 ?

記住唔好老作! 

1) 問你關於行業，技能，technical既野而你咁岩唔識答都唔使怕！話你唔識，然後請佢話你知個答案，因為你好有興趣。話你會係呢方面加強的。
2) 有的面試人鐘意係咁問，打爛沙盆問到篤。主要唔係考你知識，而係考你reasoning同係壓力下既應對。例如問你鐘意曾蔭權定係董建華，你答左其中一個後就問你點解，然後再打蛇除棍上再問你點解咁認為。到你被佢問到口啞啞話唔知，咁你就衰左。因為你答左一個你唔知點解咁講既答案，即係9up。要小心呢類型。好多時大機構尤其ibank的都會咁問。至緊要唔好老作。因為你好快比人問到口啞！慢慢答。 

4. 見工可否穿牛仔褲？見普通職位 (例如文員), 男女求職者應該穿怎麼樣的衣服才合適？ 

除非你見出賣勞力既工作，否則就應該著得比正常返工再正經小小！唔好老套！會比人感覺唔識轉彎，難教難學。講真連見工都懶得著好D準備下就真係無人幫都你啦！太前衛有乜問題就唔使講喇。花小小錢去"豬儒村"買套西裝同呔，熨件shirt，女人可以著無領T shirt,但係都係要著西裝。記住帶紙巾。早15分鐘到可以休息準備下，唔好去到個時大汗疊細汗。飲小小水食粒薄荷糖，個口千其唔好臭。人地問你要唔要野飲，一定要叫水，因為你講得野多，口乾就會口臭嫁！ 

5. 如果對方問自己的強項和弱項, 應該如何回答？

唔使怕沙塵！你強就係強，只要唔誇張就得！直接講出黎。但係要對個職位有幫助。例如：1) 我係人際關係方面做得幾好。例如以前係大學既乜乜社團做主席，同其他社團一齊搞過乜乜物物。得到好評，亦都因為咁而連任左N屆。所以我認為我都可以同客戶保持良好關係。2)我既multi tasking能力唔錯。係大學時我有N個學期讀X科好demanding既主科。重可以兼顧社團既職責。所以我認為我可以有能力同時間應付多個project（或客戶）

所有弱點千其唔好逃避，直接的，但係目標係要化危為機！例如:1) 我其中一個弱點係做野太專注，有時會忽略周圍其他野，所以我比較鐘意同一team人一齊做野。起碼可以互相提點！2) 我其中一個弱點係有時做野唔係太專注。但係呢樣野亦都另我可以留意到周圍既野，及早發現其他危機（或機會，或idea)

6. 如果對方問自己的career path, 應該如何回答？

如果要講career path, 千祈唔好講人工，要講你係未來3年會有乜野計畫同埋係未來3年你會點睇你自己，幫自己定位。要具體咁講，例如千祈唔好話『我想做經理』，你要講『我想帶領一個小小的marketing團隊及專注負責一個project』，然後再講下你係未來５至６年的期望，原理跟上面一樣！

7. 人家已經早就把CV SEND了給HR, 但HR叫我去INTERVIEW時, 常常都在我面前先看我份CV, 接著又說我不適合他們, HR不是預先看了求職者的CV後才叫人INTERVIEW嗎？為什麼有些HR好像根本沒看過求職者的CV就叫人去IN？

HR或hiring manager好多時無時間或佢地根本唔會係見你之前睇晒你張CV，我個人做法都係INTERVIEW果陣先睇求職者份CV，如果HR係INTERVIEW時先發現求職者唔符合佢地既要求，呢D就係HR既錯，但係如果你地真係好鐘意份工，你就要嘗試sell你自己同埋解釋俾對方知道點解你會適合呢個職位。 

8. 如何介紹自己? 是不是講自己過往的工作經驗？

介紹自己最緊要先講最近既經驗，慢慢講早的。但係講完university就停（除非你好特別）。最緊要同份工有關。無人對你屋企人有興趣（除非想溝你）。最近既就講多的。記住舉例說明你的經驗點解對呢份工有幫助。通常越耐以前既事就越無關痛癢，不提也罷！

9. 有沒有見工大忌？例如做了後, 僱主一定不會請？

每個僱主對於見工者都有唔同的諗法，不過以下可以俾大家參考下邊Ｄ行為係會令僱主討厭而無OFFER俾你，甚至連2nd in都無。

遲到
呢個係無藉口可言，如果真係趕唔切，最少１５分鐘前就要打電話通知對方，因為HR或Hiring manager會有30分鐘將D工作放埋一邊唔做等見工既人黎，但係如果對方到時到候都唔見人，如果你係HR或Hiring manager，你會有乜感覺？

電話
請在見工時熄手機，對方係要求見工既人100%集中INTERVIEW。
係1ST IN唔好問人有幾多日假期你係搵工做，唔係搵假期，係1ST IN的話題上一定要集中係工作度。

求職者既手要乖乖地，唔好亂咁搞呢樣搞果樣
求職者既手要乖乖地，唔好一路答人地問題，一路玩萬字夾、原子筆、睇手機等等。

有些HR或Hiring manager見你果陣會起身同埋同你握手，並且將佢既個人卡片俾你。HR或Hiring manager會好留意見工既人會唔會 1) 起身同對方握手，並且有eye contact對方，同埋會唔會同對方講早晨或你好之類；2) 自我介紹 (講自己個名就OK) ；3) 雙手接過人地遞過黎的卡片。如果連1) 和 2)都無既話，咁就好有問題。即使你唔知道果間公司係做乜野產品或做乜野生意，起碼你要知道你應徵的職位係要做D乜野，例如Sales vs Marketing有乜野分別；Finance vs Accounting; Quality；Control vs Quality Assurance。

10. 你會不會請一個帶同男朋友或女朋友或自己父母去見工的求職者？

我估無人會咁做掛！見暑期工都唔會啦！

11. 如何寫EXPECTED SALARY？(寫得高又無得IN, 寫得低又蝕底)

如非必要都唔好寫。好多HR firm先會想知。你連份工都未見，都未知大家乜水就話expect. 點expect呀！不過咁，我請人都會list salary range.記住個價錢係一個marketing point。貼住市價高少少係冇問題，只要你覺得自己值。如果我最多打算比20k搵個人，我post 18K，咁如果見到個真係OK既，但要求21K，我會用20.5K成交！老實講，幾舊水一個月，開多陣冷氣，打多幾個長途電話都去左啦！好多老闆唔會咁計既。最緊要係值得比！請個日日蛇王幾個鐘既咪重貴！

12. 你認為一份怎樣的CV才算是好的CV？

無人會好詳細咁睇resume嫁！
一般fresh grad無乜理由會過一頁紙。除非擺左好多無關痛癢既野。咁你諗下，睇咁多無關既野係咪好悶呀？
其實睇resume最主要都係睇工作經驗同學歷。以我既喜好，最好係一頁:

(姓名要用粗體) NAME
Address
Objective : To obtain a entry level position in Marketing
(Optional) (Highlight一些特別): 

*Experience in conducting
Market Research in Hair Product industry

*Experience in xxxxx imaging software

*Chairman of Marketing Society in UniveristyExperience :

公司名及職位要用粗體，如果要形容自己的工作的話
"Maintained customer relationship" 當然不及 "Managed a customer portfolio and generate annual sales of $50 million"呢個講法咁好。最好用 "Managed", "Coordinate", "Generate...revenue", "Solve.... problem"... 等等正面的字眼.

Education :
Highlight degree同學校名如果你的工作經驗唔夠, 當然最好講下你係學校入面做過乜野projects
課外/工餘活動:你可以列舉一D可以突出你自己的活動，例如一D membership或者一D學會既committee、集郵、玩車就唔駛話俾人知, 但如果係香港集郵會副主席既話，都可以寫係CV度.

13. 通常1st IN後要等多久才有2ND IN ?

一般僱主一定講會係一星期內通知, 以我個人經驗, 如果求職者是合適的話, 通常2-3日便會收到通知, 呢樣係每間公司都唔同, 有時大公司的通知時間跟細公司係唔一樣。 

14. 2ND IN通常問什麼問題？會否和1ST IN一樣？

呢樣野係好講1ST IN係乜野人IN你, 如果1st IN 係HR, 咁2ND IN多數係同你職位有關的manager，又或者係大老細, 真係間間公司唔同, 不過2nd IN 多數係會問一D比較技術性同埋知識性的問題。